Шүүхийн ерөнхий зөвлөлийн 2025 оны 02 дугаар тогтоолоор захиргааны хэргийг харьяалан шийдвэрлэх анхан шатны шүүхийн шүүгчийн 10 сул орон тоонд сонгон шалгаруулалт зарлаж, нийт 41 нэр дэвшигч бүртгэгдсэнээс 40 нэр дэвшигч хууль зүйн мэдлэг, чадварын шалгалт өгсөн.
Нэр дэвшигчид өнөөдөр (2025.04.14) эрх зүйн баримт бичиг боловсруулах болон хэл найруулга, бичгийн чадварын 15 онооны шалгалт, салбар эрх зүйн мэдлэг сорилын 15 онооны шалгалтаа өгч захиргааны хэргийг харьяалан шийдвэрлэх анхан шатны шүүхийн шүүгчид нэр дэвшигчийн хууль зүйн мэдлэг, чадварын шалгалт дууслаа.
Шүүхийн ерөнхий зөвлөлийн 2025 оны 04 дүгээр сарын 14-ний өдрийн ээлжит бус хуралдаанаар захиргааны хэргийг харьяалан шийдвэрлэх анхан шатны шүүхийн шүүгчид нэр дэвшигчдийн хууль зүйн мэдлэг, чадварын шалгалтын үнэлгээг баталсан
Нэр дэвшигчийн хууль зүйн мэдлэг, чадварын шалгалт нийт 70 оноотой бөгөөд 50 ба түүнээс дээш оноо авснаар уг шалгалтад тэнцэж, мэргэшил, ёс зүй, зан төлөвийн шалгалтад орох эрхтэй болно. Захиргааны хэргийг харьяалан шийдвэрлэх анхан шатны шүүхийн шүүгчид нэр дэвшигчдээс 12 нэр дэвшигч хууль зүйн мэдлэг, чадварын шалгалтад 50 ба түүнээс дээш оноо авч тэнцсэн байна.
Шалгалтад тэнцсэн нэр дэвшигчийг баталсан Шүүхийн ерөнхий зөвлөлийн тогтоолтой танилцана уу.
Батлагдсан хуваарийн дагуу маргааш (2025.04.15) давж заалдах шатны шүүхийн шүүгчид нэр дэвшигчийн хууль зүйн мэдлэг, чадварын шалгалт 08:00 цагаас эхэлнэ.
Шалгалтад оролцох нэр дэвшигчид цагийн хуваарийн дагуу, хувийн зохион байгуулалтаа хангаж оролцохыг хүсье. Хуваарьт цагаас хоцорсон тохиолдолд шалгалтад оролцуулах боломжгүй болохыг анхааруулж байна.
ШҮҮГЧИЙН СОНГОН ШАЛГАРУУЛАЛТ, ХҮНИЙ НӨӨЦИЙН ГАЗАР
МЭДЭЭЛЛИЙН ТӨВ